उदगीर प्रतिनिधी
भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त देवणी शहरात सामाजिक जाणिवेतून स्तुत्य उपक्रमाचे आयोजन करण्यात आले. 'कीर्ती सामाजिक विकास संस्थे'च्या वतीने शहरातील पाल टाकून राहणाऱ्या अतिशय गरीब, बेघर आणि गरजू कुटुंबांना अन्नदान करून जयंतीचा आनंद त्यांच्यासोबत साजरा करण्यात आला. या उपक्रमाने सामाजिक बांधिलकीचा एक आदर्श घालून दिला आहे. महापुरुषांना विनम्र अभिवादन कार्यक्रमाची सुरुवात भारतरत्न डॉ. बाबासाहेब आंबेडकर यांच्या प्रतिमेचे पूजन करून करण्यात आली. पोलीस ठाण्याचे बिट जमादार श्री. नामदेव धुळशेटे, श्री. हणमंतजी केंद्रे आणि श्री. गणेशजी मोरे यांच्या हस्ते महाप्रतिमेचे पूजन करून पुष्पहार अर्पण करण्यात आला. तसेच, शासन समाजभूषण पुरस्कार प्राप्त माजी पोलीस पाटील तुकाराम पाटील यांच्या हस्तेही महाप्रतिमेला अभिवादन करण्यात आले. याप्रसंगी उपस्थितांनी डॉ. आंबेडकरांच्या विचारांचे स्मरण केले.गरजूंच्या चेहऱ्यावर उमलले हासू देवणी शहरातील मुख्य रस्त्यांच्या कडेला पाल टाकून अत्यंत प्रतिकूल परिस्थितीत राहणाऱ्या कुटुंबांना या उपक्रमांतर्गत अन्नाचे वाटप करण्यात आले. सण-उत्सवाच्या काळात समाजातील शेवटच्या घटकापर्यंत मदतीचा हात पोहोचवल्यामुळे गरजू कुटुंबांच्या चेहऱ्यावर कृतज्ञतेचे भाव दिसून आले. कीर्ती सामाजिक विकास संस्थेच्या या संवेदनशील उपक्रमाचे शहरात सर्वत्र कौतुक होत आहे.
मान्यवरांची उपस्थिती या सामाजिक उपक्रमाच्या यशस्वीतेसाठी परिसरातील अनेक कार्यकर्त्यांनी आणि नागरिकांनी विशेष परिश्रम घेतले. यावेळी प्रतीक डोंगरे (सामाजिक कार्यकर्ता), राम डोंगरे (आरपीआय जिल्हा सचिव), अमर सूर्यवंशी (सामाजिक कार्यकर्ता), प्रशांत शिंदे (सामाजिक कार्यकर्ता), सत्यवान म्हेत्रे, निळकंट डोंगरे (आरपीआय शहर अध्यक्ष) आणि दिगंबर कांबळे यांच्यासह अनेक नागरिक मोठ्या संख्येने उपस्थित होते.संस्थेच्या वतीने करण्यात आलेल्या या उपक्रमामुळे 'डॉ. बाबासाहेबांच्या विचारांची खरी अंमलबजावणी मानवसेवेतूनच होते', हे पुन्हा एकदा अधोरेखित झाले आहे. कार्यक्रमाच्या शेवटी संस्थेच्या सर्व पदाधिकाऱ्यांनी उपस्थित सर्व मान्यवरांचे आणि नागरिकांचे आभार मानले.
Social Plugin